التورنت بالفلاقي!

بنحاول نشرح التورنت من غير مانحرمكم من أي معلومة مهمة، وبالفلاقي! فلو كنت من الناس اللي تبي المعلومة آهو أني جمعتهالكم في صفحة وحدة، وكانك تنبال وماتبيش تقرا وتبي كل شي ايجيك لعندك، خليك زي ما إنت! تو ينفعك!!

المقالة قسمتها لأربعة طروف، الجزء الأول عام ونشرح فيه شن هو التورنت، والجزء الثاني كيف قصة التنزيل من التورنت بالزبط، أما الجزء الثالث فكيف تنزل فيلم ولا لعبة من التورنت، والجزء الرابع والأخير ففيه شوية ملاحظات ونصائح مفيدة وحتسهل عليك القصة كلها.

الشرح راهو للمبتدئين، فكانك من العباقرة ياريت تفيدنا وتعطينا شوية من علمك!

نخشو في الموضوع:

أولاً شن الفرق بين التورنت والتحميل العادي؟

التحميل العادي إنت قاعد تنزل في ملف فيلم أو حلقة مسلسل أو عدة ملفات من سيرفر عالإنترنت، يكون إمتدادهم مثلاً mp4 ولا mp3 ولا .zip ولا .rar يعني المهم زي كأنك قاعد تنسخ في ملف من كمبيوتر للثاني، والطريق هادي لازم يكون الكمبيوتر اللي تنسخ منه مفتوح ومتوفر ديما، والخدمة هادي مش كل حد يقدر ايديرها، يعني توف كمبيوتر بمواصفات مليحة باش يقدر يلبي طلبات التنزيل من كل الناس في الإنترنت، مش حتلقاها بلاش وعلى الأغلب الملف حيمتسح باش يوفر مساحة لملفات ثانية.

التورنت تخيلك مش تنزل الملف ذاته بل حاجة هكي زي الإختصار أو الshortcut وهو ملف صغيرون هلبا مش هو الفيلم نفسه، يعني تفتحه مايعطيكش فيديو، لكن لو عندك البرنامج المناسب وتفتح الملف هذا اللي الإمتداد متاعه يكون .torrent حيبدا فعلياُ في تنزيل الملف الحقيقي اللي إنت تبيه، بس الفكرة هنايا إنه مش حينزله من كمبيوتر واحد بل من عشرات كان مش مئات الكمبيوترات على الإنترنت وإنت بدورك لما تبدا في عملية التنزيل هيا، تبدا تعطي لغيرك من غير ماتحس.

ثانياً كيف القصة بالزبط متع التنزيل في عالم التورنت؟

إنت هكي فهمت الفرق بين التحميل العادي والتحميل عن طريق التورنت، باهي في التحميل العادي ساهلة واحد عنده فيلم يمشي يرفعه على سيرفر عالإنترنت ويمشي يخش منتدى ولا موقع ويحط رابط التنزيل للناس، وإنت تجي تخش عالرابط وتبدا تنزيل، باهي التورنت شن قصته؟

التورنت ياسيدك بن سيد، واحد عنده ملف فيلم في كمبيوتره الخاص، يمشي يركب برنامج مع تنزيل تورنت زي uTorrent ولا Vuze ويقول للبرنامج هذا إني نبي نصنع تورنت جديدة إسمها فيلم عمر المختار! ياخد  الفيلم ويتكونله رابط جديد على هيئة ملف أو إختصار shortcut إمتداداه .torrent ويحطه في واحد من السيرفرات الموجودة عالإنترنت وهكي صاحبنا هذا يكون زرع “بذرة” هي الفيلم هذا.

يجي شخص زيك يدور على فيلم عمر المختار، يمشي في واحد من المواقع اللي توفر تورنت ويبدا يدور ويطيح في التورنت الجديدة هادي واللي موجودة في كمبيوتر واحد فقط عالإنترنت اللي هو كمبيوتر صاحبنا اللي هدرزنا عليه، تمشي إنت تنزلها وبرنامج التورنت اللي مركبه يلقاها وتنفتح فيه ويقولك وين تبي إنزلها في كمبيوترك وتعطيه مكان ويبدا ينزل في محتواها واللي هو ملف فيلم عمر المختار.

في نفس الوقت اللي إنت تنزل فيه ايجي شخص ثالث يدور ويلقاها والمرة هادي حيطلعله إنها متوفرة على زوز كمبيوترات مش واحد بس وحتكون عملية تنزيلها اسرع شوية، ويدير زيك وينزلها ويبدا هو نفسه شخص ثالث لو جي واحد رابع بينزلها حيلقاها متوفرة على 3 اجهزة وحتنزل بشكل اسرع، وهكذا.

وصلاتك الفكرة هكي ولا مازال؟

يعني كل ما يكثرو الناس اللي تنزل في التورنت كل ما تكون التورنت سريعة والحياة جميلة.

طبعاً كل شخص في قصتنا ليه وصف، الأول اللي حط البذرة ومخلي الناس تنزل منه هذا اسمه Seeder واي حد غيره ينزل في التورنت ومش مشاركه مع الغير (زي حالاتي أني) هذا يسموه Leecher وكل ما يكثرو السييدرز كل مايكون افضل والتنزيل اسرع وكل ما يكثرو الليتشرز التورنت حتكون بطيئة والتنزيل عبيط.

طبعاً اغلب الناس اللي عندها حصة شهرية زي حالاتنا تلقاه ينزل التورنت ويبدا ينزل في محتواها ولما يكمل تنزيل الفيلم يوقف التورنت باش ماينفلقش الرصيد ويبدا العالم كله ينزل في الفيلم من جهازه وهو مايندريش، لهذا يكمل التنزيل نمشي نحطها في مجلد ثاني ونحذفها من برنامج التورنت، أو مثلاً ندير عليها كلك باليمين ونديرللها stop.

ثالثاً كيف نحصل فيلم ولا مسلسل ولا لعبة عن طريق التورنت؟

توا ملفات التورنت هادي حتكون متوفرة في هلبا مواقع، وكل موقع تلقاه ينسخ في تورنت من مواقع ثانية وهكذا، وكل موقع مشهور بنوعية معينة من التورنت، في اللي مخلطها من كل نوع برامج افلام كتب العاب مسلسلات، وفي اللي متخصص في افلام بس أو مسلسلات بس وهكذا، وطبعاً مع الوقت إنت حتعرف مواقع معينة، لكن أهو نعطيك حاجات تبدا بيها مسيرتك التورنتية:

• موقع yts.ag هذا اي فيلم أجنبي ينزل في السينما مش حتلقاه فيه طول، بتستنى شهر شهرين تلاثة لين تنزل نسخة البلوراي ووقتها بس حتلقاها فيه، وحتكون اصغر حجم وأنقى صورة على الإنترنت بلا منازع.
• موقع eztv.ag هذا حتلقى فيه أي مسلسل اجنبي ومصنف بالحلقة وحتى يقولك الحلقة الجاية آمتا وغالبا الحلقة تطلع في التلفزيون بعدين 6 ساعات أو أقل تلقاها في الموقع هذا تستنى فيك.
• موقع mkvcage.com هذا جامعها افلام ومسلسلات مع بعض لكن مش ديما احسن نسخة، يعني مرات ينزل الفيلم فيه مرتين وتلاتة أول مرة مخنوب من السينما والصوت مضروب والمرة الثانية ينزل صوت مليح وصورة باهية.

طبعاً كل واحد وعنده مواقعه المفضلة، فياريت تكتبلنا في تعليق شن هو موقعك المفضل وعلاش، وماتنساش تكتب علاش مش تبلط موقع وتمشي!

أهو نوريك بالصور كيف الموضوع، مثلاً تخش موقع yts.ag ويعجبك فيلم معين، دير كلك على النقاوة اللي تبيها وخلي نقولو درنا كلك على 1080p.

هكي حينزل معاك ملف تورنت عبارة عن اسم الفيلم ونهايته .torrent وزي ماقلنا راهو مش هذا هو الفيلم ذاته، لا، هذا مجرد إختصار وعن طريقه تنزل الفيلم.

افتح الملف هذا بأي برنامج متع تنزيل تورنت، حاجة زي utorrent او vuze أني نستخدم في برنامج FDM أو Free Download Manager منه برنامج متع تنزيل ملفات عادية وكذلك تنزيل تورنت، المهم أول ما تفتحه حيعطيك محتوى التورنت هيا ويسألك شن تبي تنزل منها ووين تبي تنزله وحجم الملفات وغيره، بس من الأخير كلك على داونلود من غير تفكير.

حيبدا ينزل في التورنت زي ماتشوف مع السرعة الرهيبة اللي عندي قالي تبي يوم و21 ساعة باش تكمل!!

طبعاً حفاظاً عالحصة الشهرية ندير في كلك باليمين عالتورنت ونحي في علامة الصح من على Enable seeding باش الجماعة ماتنزلش مني، وإنت لو عندك إنترنت غير محدود خليك طيب وماتنحيهاش لأن الموضوع متع التورنت كله مبني على الناس الطيبة اللي مدايرة سييد ومخلية العالم ينزل من أجهزتها!

وباش تتأكد من إنك مش قاعد تعطي للعالم ركز على جيهة سرعة الرفع upload speed وعدد الناس اللي ترفع منك peers تلقاهم الزوز فاضيات أو بحداهم علامة ( – ) هكي أمورك تمام.

توا إنت وسرعة الإنترنت لين تكمل التورنت، وإنت وعدد الseeders وكل ما يكونو هلبا كل مايكون التنزيل افضل وماعندك لاش تخمم تقدر تخليها طول الليل تنزل وتقدر توقف وتكمل يوم ثاني أو تمشي لقهوة وتنزل من غادي، الفكرة إنك تنزل من هلبا ناس مش من سيرفر أو كمبيوتر واحد لو فصل عليك تقعد تعاني!

رابعاً بنعطيك شوية ملاحظات ونصائح:

1. مرات تخش مواقع تورنت بدل ما تلقى تنزيل مباشر تشوف علامة مغناطيس، شن معناها هادي؟ معناها إنك طالب تنزل التورنت هادي من أفضل وأسرع رابط متوفر على أكثر من سيرفر عالإنترنت عنده نفس التورنت هيا، يعني من الأخير ماتوجعش راصك لما تشوف علامة المغناطيس هيا كلك عليها وحينزلك ملف التورنت وبعدها شغله على برنامجك وخليها تنزل على مهلها.

2. أنواع الفيديوات ونقاوتها لازم تفهمها لأنك بتخش مواقع تورنت بتلقى الفيلم مكرر مليون مرة ومش حتعرف أما واحد تنزله، طبعاً اسم الفيلم حتلقى فيه حروف معينة هي عنوان صيغة نقاوة الفيلم، مثلاً شوف الاسمين هما:

Jack.Reacher.Never.Go.Back.2016.1080p.BluRay.x264-[YTS.AG].mp4

Jack.Reacher.Never.Go.Back.2016.1080p.TS-[DNGA].mp4

طبعاً الملف الأول نقاوته بلو راي واللي مداير سييد للتورنت هادي هو موقع yts.ag واللي معناها خود وعيونك مغمضات ومن غير تفكير هادي افضل تورنت للفيلم هذا/، بينما الملف الثاني فهذا نقاوته TS وهي نقاوة تعبانة هلبا، كانك خلاص بتموت كان ماشفتش الفيلم نزلها وشوفها لكن كان تصبر لين تنزل نسخة البلوراي حتستمع!

وهذا جدول بأنواع الصيغ المعروفة للفيديو عالإنترنت (المصدر) وكل وحدة شن هية وجودتها، وإنت شوف أمورك:

عنوان الصيغة	معلومات	الجودة
BD-rip	نسخه مأخوذه من ال Blu-Ray Disc مباشره وهي إلى الآن أفضل نسخة للافلام بحيث دقتها تكون 720p أو 1080p واحجامها تتراوح بين 1.5 إلى 3.5 جيجا	ممتازة جداً
BR-rip	هو اختصار لجودة فيديو فائقة من قرص بلوراى Blu-Ray Disc عالى الدقة البصرية وهى تماثل جودة HD حيث يمكن ان تكون 720p أو 1080p وهى أعلى الجودات الموجودة حتى الآن	ممتازة
HD-rip	HD هو اختصار High-Definition وتعنى عالي الدقة. تتباين الافلام تحت هذه الجودة في المصدر المنسوخ منه الفيلم. أحد هذه المصادر هو الإشارة التلفزيونية عالية الجودة مثل قنوات HBO HD أو من خلال Blu-Ray CD وهي أسطوانات تم تطويرها برعاية سوني ولها قدرة تخزينية عالية تفوق أسطوانة DVD. أهم المزايا في فيلم HDrip هو مساحة الصورة حيث الصورة أكبر وأوضح منها في فيلم DVD والصوت في فيلم HDrip يضم عدد قنوات صوتية أكثر من فلم DVD.	ممتازة
DVD-rip	Rip تعني النزع وفي عالم الأفلام تعني النسخ. هي النسخة النهائية التي تصدرها الشركة المنتجة للفيلم للأسواق.	صغيرة وممتازة
R5	R5 هو اختصار Region 5 وهي تعني المنطقة الخامسة. في محاولة من صناع الافلام لمحاربة القرصنة قاموا بتقسيم العالم لعدة مناطق تحتوي المنطقة الواحدة عدة دول. الفيلم المخصص لمنطقة معينة لا يمكن تشغيله إلا في تلك المنطقة. وطبعا فشلت المحاولة بسبب عدم التزام مصنعي مشغلات الديفيدي، الشركات المغمورة وليست العملاقة مثل سونى وباناسونيك، بهذه المناطق وأيضا نجاح ناسخي الافلام في إيجاد طرق للالتفاف على هذه العقبة. وفي محاولة أخرى لمحاربة القرصنة وخصوصا في المنطقة الخامسة والتي تشمل روسيا والهند ومعظم أفريقيا قام المنتجون بإصدار الأفلام بجودة DVD ولكن من غير المرحلة الأخيرة في صناعة الديفيدي وهي تقريباً لا تؤثر على جودة الديفيدي ولكنها مكلفة مادياً فتم حذفها لتنزيل سعر الفيلم في تلك المناطق بالإضافة إلى حذف بعض الإضافات التي توضع عادةً في الديفيدي مثل تعليقات المخرج والمشاهد التي حذفها المخرج من الفيلم. هذة النسخ يتم نسخها وتوزيعها في الإنترنت تحت مسمى R5.	جيدة
DVDscr	Scr هو اختصار Screener. الفيلم ذو جودة DVDscr هو فيلم ذو جودة DVD توزعه الشركة المنتجة للفيلم من أجل الدعاية للفيلم أو من أجل الترشح لجائزة في أحد المهرجانات السينمائية. غالباً ما تقوم الشركة المنتجة بوضع كتابة على الصورة تحذر من نسخ الفلم أو توزيعة وبعض الشركات المنتجة تحول الصورة من ملونة إلى اسود وأبيض في بعض المشاهد ثم تتحول مرة أخرى إلى ملونة. جودة الفلم ممتازة غالبا ومماثلة لجودة DVDrip.	جيدة
TC	TC هو اختصار Telecine. الفيلم ذو جودة TC يسجل باستخدام ماكينة تسجيل رقمية تقوم بتسجيل الفيلم مباشرةً من جهاز العرض السينمائي. جودة الصوت والصورة عالية ولكن بسبب ارتفاع أسعار الجهاز، يندر توافر نسخ TC. جودة TC هي أفضل من CAM و TS ولكن اقل من DVDrip.	سيئة نوعاً ما
TS	TS هو اختصار لكلمة Telesync. الفيلم ذو جودة TS هو نفس الفيلم ذو جودة CAM لكن مصدر الصوت مختلف فعوضاً عن استخدام الميكروفون المدمج في الكاميرا يتم استخدام وصلة مباشرة من مصدر للصوت (بعض السينمات توفر وصلة تمكن لضعاف السمع توصيل سماعات رأس لسماع الصوت بشكل أفضل). وجود مصدر مستقل للصوت لا يعني بالضرورة ان الجودة أفضل من CAM.	سيئة
CAM	Cam هو اختصار لكلمة Camera. الفلم ذو جودة CAM هو فيلم يتم تصويره باستخدام كاميرا شخصية[1]، غالباً باستخدام كاميرا رقمية. في بعض الأحيان تكون الصورة ثابتة بسبب وضع الكاميرا على حامل ثابت ولكن استخدام الحامل غير ممكن في أغلب الأحوال لذلك يلاحظ بعض الاهتزاز في الصورة. الصورة أيضا قد تكون بزاوية غير مريحة بسبب عدم قدرة حامل الكاميرا على اختيار مقعد مناسب للتصوير. الصوت يتم تسجيله من الميكرفون المدمج في الكاميرا وبالتالي يسجل كل الاصوات المحيطة من ضحك أو تمتمة. أفضل الظروف لجودة CAM هي عنما تكون القاعة خالية، وهذا يندر توافره. عموماً جودة CAM هي جودة سيئة لكنها غالبا ما تكون الأسبق في الصدور قبل كل النسخ (نفس الفيلم ولكن مسجل بطريقة مختلفة) الأخرى ذات الجودة الأعلى.	سيئة

3. كيف تنزل ترجمات للفيلم؟ القصة كلها في اسم الملف متع الفيلم أو المسلسل، كان غيرته مشت فيك وحتتعب باش تحصل ملف ترجمة مناسب، طبعاً لأن كل شخص دار سييد للتورنت هادي محصلها بطريقته والترجمة تعتمد بالكامل على طول الفيديو وتوقيته لازم يكون مطابق للترجمة لهذا لما تبي إدور على ترجمة، أول حاجة تبي تنسخ اسم الملف بالزبط بدون إمتداد، وبعدها تمشي لواحد من المواقع متع الترجمة وادور على الترجمة بإسم الملف اللي عندك.

مثلاً فيلم Jack.Reacher.Never.Go.Back.2016.1080p.BluRay.x264-[YTS.AG].mp4 خود اسم الملف زي ماهو لكن من غير الإمتداد متاعه يعني Jack.Reacher.Never.Go.Back.2016.1080p.BluRay.x264-[YTS.AG] وامشي بيه مثلاً لموقع subscene.com

دير لصق في مربع البحث وكلك على بحث.

طبعاً في نتيجة البحث حتجيك عشرات الترجمات بمختلف اللغات، وتقدر إدير فلتر في الموقع تخليه يطلعلك العربي بس، لكن المهم تو في حاجات لازم تعرفها باش ماتتعبش..

توا بتخلي عيونك على 5 حاجات مهمة:

1. لغة الترجمة. Arabic
2. اسم الفيلم. Jack Reacher Never Go Back 2016
3. نوع صيغة الفيلم. BDRip
4. اسم القروب أو الشخص اللي دار سييد. YTS.AG
5. اسم صاحب الترجمة واللي مع الوقت وطول المدة حتكون عندك اسماء لمترجمين ملاح أو تعجبك ترجمتهم، منهم الدكتور علي طلال وKiller Spider بالنسبة ليا.

طبعاً كلك على الترجمة لما تلقى كل هالحاجات متطابقة، وزيدها حاجة لما تلقى لون الترجمة اخضر معناها نالت استحسان الناس الي نزلتها وأغلب الظن تكون ترجمة مليحة.

الخاتمة

هكي تقريباً عطيتك كل المفاتيح اللي تخليك تقدر تهيج في عالم التورنت والافلام والمسلسلات، لو عندك أي اضافة ياريت تخليهالنا في تعليق، بالك نجمعها ونحطها في المقالة هادي باش يستفيد غيرك.

طبعاً رد بالك، هلبا بلدان في العالم تمنع في التورنت وتعتبره مخالفة للقانون! راجع قوانين شركة الإتصالات عندك وبعدها قرر هل تنزل بالتورنت أو لا.

شاركنا الحضور والمتعة في مجموعة النادي الليبي للأفلام وكذلك النادي الليبي للمسلسلات.

وفي الأخير نقولك إن شاء الله تكون استفدت وإن شاء الله نكونو معرفة خير، والسلام عليكم.