علم ياقايد علمنا كيف ندمر مستقبلنا!

 

hitler and me

أكثر حاجة مضحكتني هاليومين هما أنصار معمر. مجرد البلاد ماتخش بعضها يجوك يقولولك (مش قلنالكم هذا اللي بيصير؟) و(سينصفنا التاريخ) وغيره من الأسلوب متع حني على صح وإنتم على خطأ.

معمر كان يقدر يطور من ليبيا ولا لا؟ كان يقدر يدخلنا للعالم بدل ما يجهلنا ويدسنا في حكة ومايطلع منها إلا اللي عنده جهد؟ صح ولا؟ ماكانش يقدر يخلينا ناش مثقفين متعلمين ولا لا؟ هو إختار إنه يجهلنا ويخلي التعليم بالواسطة ويعيش هو وحاشيته من فلوس نفط البلاد والباقي يستثمره برا ومايطلعش منها إلا جماعته وبس ولا؟

اللي صاير توا كله من راصه، حتى لما طلع سيف وقعد يقول بالحرف اللي قاعد ايصير توا، ولأنه كذاب وتافه طول عمره نعرفوه، ماصدقاش حد، لو تعب شوية ودار شعبية ومصداقية لنفسه راهو لما طلع وتكلم صدقناه كلنا وراهو ماصار اللي صار.

أني مؤمن إيمان تام أن داعش اللي محتلين ليبيا جزء كبير منهم من أنصار معمر وباقي الخاسرين في ثورة فبراير، قررو أنهم يرجعو على صهوة الثعلوبة والذبح للكل اللي طلعهم برا البلاد.

بتقولي سينصفنا التاريخ ويطلع الحق ويبان؟ تي والله التاريخ قاعد يلعن في اصل اصلكم، وكل الخراب من ورا ايديكم، والله الثورة إلا كانت نظيفة ودليلي شوف الليبيين كيف كانو يحبو في بعضهم قبل ما يخشوها المتسلقين وأزلام النظام السابق وركبو موجة فبراير بعد ما رجعو التريس لحياشهم، بعد ماشدوها مردف معمر المدفون خربت وزادت تخربت.

شعاركم حيقعد دائماً وأبداً: إلى الأمام والكفاح الثوري مستمر. وراهي مش “ثوروي” بل “ثوري” نسبة للثور، زي حبيبكم المدفون.

توا إنتم خليكم متشمتين لين يجيكم القص. وقتها لومونا وقولو هذا كله من ثوار الناتو، وإنتم ليبيا عندكم بدت يوم 17 فبراير 2011، ماهي كانت جنة ليبيا باش قامت فيها ثورة؟ وكان ليبيا جنة ومافيهاش ظلم ولا خراب راهو قعمزنا كلنا في حياشنا، وماتحلحز من مكانه إلا العميل والخاين!

ليبيا من حوازة منظمة إلى حوازة فوضى، والعيب كله عاللي خلاها حوازة وعامل الكائنات اللي فيها على إنهم حيوانات، اكرمكم الله، وفوق منها تقولوله علم ياقايد علمنا كيف نحقق مستقبلنا!؟

تو لما ايجيك القص حتعرف إنك إنت السبب في خراب ليبيا لأنك ساهمت في خرابها طول 42 سنة وماحاولتش تخليها أفضل، وبعد 42 سنة من النهب والخنبة والرندخة في العز والشبع، وتنوض عليك ثورة تستغرب وتقول مش من حقكم!

لما كنا نعانو من ضعف المرتبات والحرمان من الدراسة العليا بالخارج ومصادرة أرزاقنا بإسم الثورة والقمع بإسم الثورة والقتل والوصف بالبرجوازية والإعتقالات عالماشي والإهانة والتخويف والإرهاب لكل من يتجرأ ويطلع برا السكة وبعثرة فلوسنا في أفريقيا وغيرها وتبزعيقها برا على عاهرات أوروبا وعلى يدين ولاد معمر نفسه، وتمليك مقدرات البلاد لصغاره واحد شاد قطاع كذا والتاني كذا والثالث كذا وهلم جراً، في حياتكم ما قلتو كلمة على معاناة الوطن، وتقولو دوم معمر هو القائد من غيره خراف وزايد!

لو رجع بيكم الزمان أقسم بالله حتديروا أحرف من اللي مدايرينه الرابش متع اليوم، لأنكم تبكو على صلاحياتكم الحرام اللي فقدتوها بس، مش على ليبيا، ولو هامتكم ليبيا راهو حالكم وحالنا مش هكي.

أمشي زيد فيه تربح. تو ينفعك اللي إدير فيه.

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s