العالم الأول.. والعالم الليبي!

أفهموا اللي بنكتبه توا رجاء، كلامي موجه لفئة معينة من الناس ومش للكل:

لما بتتكلم على مجزرة بوكوحرام أو مجازر سوريا أو العراق أو غيرها من المجازر اللي تصير في دول العالم الثالث، وبتحاول تقارنها بالمجزرة الأخيرة في فرانسا (شارلي هيبدو) أو أي حادثة زيها ماتو فيها حفنة من الناس (مش مدن وقرى) واللي صارت في دول العالم الأول فبجديات لازم تراجع حساباتك ولازم وتفهم إنه لاتجوز المقارنة!

في نظر هلبا ناس من دول ثانية (بالإضافة لهلبا من الليبيين) حني في مجملنا ناس همج وأرواحنا رخيصة!

بتقولي كيف همج؟

  1. أول حاجة خلي نعرفو شن معنى الكلمة، تمام؟؟ كلمة هَمَج هي حالة شعب لم يأخذ بأسباب الحضارة ولازال بعض البشر يعيشون في همجيّة وحني منهم عن جدارة.
  2. مافيش حوار عندنا، أول رد فعل على أي موقف مع الغريب هو تعلاية الصوت والتكشيخ والدفان، في أي مكان التفحيج تلقاه، ونادراً ما تلقى شخص عاقل متزن محترم.
  3. أقرا الأحداث الأخيرة والقديمة في ليبيا، شن حتلقى؟ أبداها بمعمر وردة فعله على مظاهرات الناس وكذلك ردود أفعال مناصريه وبعدها ردود أفعال أعدائه وحتى بعد ما مات مازال مستمرين على النهج المعمري وشكلنا إلى الأبد حنستمرو.
  4. محطات البنزينة وكوش الخبزة والهمجية اللي تصير فيها.
  5. أي حاجة ليها علاقة بالقرايا والعلم عندنا دوة فاضية، ونتحججو بأن العلم اللي يستحق القرايا هو العلم الشرعي (قرآن وسنة) يعني يحسسوك إنك خشيت جامعة الأزهر مع اول خطوة تعتبها في ليبيا.
  6. تبي تحاول إدير مشروع حضاري زي الرقم الوطني باش تسهل حياة الناس تكتشف إنه مجرد ورقة زايدة عليك وذهاب شيرة جديدة داروهالك باش تمشي تشد طوابير في جرايرها، يعني بجديات مش فاهمين الغرض من أي حاجة حضارية ولازم نحولوها لفوضى ومصدر أكل حرام.
  7. أفتح النت ودور مواقع ليبية شن حتلقى؟ صفحات فيسبوك سياسية (على أساس) ووكالات أخبار (على أساس) وصفحات وهمية وحسابات وهمية وعراك وسبان وصور مفبركة وإشاعات وهلوسات طبية وعلمية خيالية وطبخ وكورة وغير هكي التقنية مانفهموش فيها إلا مارحم ربي وماتلقى إلا هذا يسب في هداكا وبس.
  8. أي حد أيقول رأيه بصراحة تكون ردة الفعل عنيفة عليه خصوصاً لو تكلم على حاجة في الدين، كل شي تكلم عليه إلا الدين، سبحان الله وكأن الدين خلق للشيوخ وكهنة العصر أما العبد فضم فمك وطبق وإنت ساكت وماليكش حق تسأل وتهدرز وتعبر عن رأيك، بجديات عصور مظلمة عايشينها ومش داريين بروحنا! وتقولي كيف همج؟ وتقولي حني حضارة؟
  9. اساليب زي الخطف والارهاب والقتل هادي الناس تتعاقب في جرتها وتنحبس، مش تخطف رئيس وزراء دولة وتطلع تاني يوم من وسط مقر رئاسة الوزراء وتقول أني خطفته وتروح وعادي الجو تمام وتبي الناس اللي تتفرج ماتقولش علينا كشعب ساكت وعاجبه اللي صاير إننا مش شعب همجي؟ تي حتى كتيبة عالنت خايفين منها تقول بالك يخطفونا وأني صاحب عيلة وأني مش عارف شني، يعني باهي لما إضم فمك وتسكت إنت هكي خدمت عيلتك ولا كيف؟ يعني العالم اللي مخليه لصغارك بسكاتك، شن شكله بالزبط؟

بتقولي كيف أرواحنا رخيصة؟

  1. الموت عندنا بربع قرش، يعني حد ناشبك ولاضايقك في الطريق طلع مسدس وطربقه! هو من زمان الإجرام موجود لكن كان صعب شوية إتطلع سيف ولا موس وتنخص حد وإنت في سيارتك وهو في سيارته، وتو مع الupgrade اللي صار للمجرمين ولت ليبيا بالفعل San Andreas واللي بمسدس واللي بقناصة وتوقع يطلعلك من الروشن ببازوكا، الخلاصة ولت الحياة رخيصة ونقتلك ياتقتلني، الحل الأول هو العنف وعلى آخر العيار.
  2. لما حد يموت أو ينخطف مانعدلوش، الناس اللي تنوض وتتكلم على الأكثر صحابه وعيلته بس، الغير ماشيين بنظام أخطى راصي وقص.
  3. لما حني بروحنا رخصنا من أرواحنا فالغير حيشوفنا رخاص وماليناش قيمة، لأننا حني نفسنا مش عاطيين قيمة لأرواحنا، ومش نتكلم على إنك إنت تعطي قيمة لروحك بنفسك، لا نقصد لما تعطي قيمة لروحك بأنك إدافع على غيرك مش تستنى لين يطق فيك حد ووقتها بس تتحرك، هادي أنانية.
  4. ماعندكش أي مشكلة إنت ياليبي إن خوتك في مكان تاني في هالبلاد أيموتو كل يوم ومع هذا قاعد تطلع القهاوي وتهيج وتخش النت وتحط في صور الماكلة اللي تاكل فيها في قهوة بلا بلا بلا وهادي كيكة من مطعم جغ مغ جغ وهلم جراً.
  5. حالياً تتكلم تنقام، هادي حقيقة لاغبار عليها، اول مايتم تسليط الضو عليك ويبدا ليك تأثير فجأة “شلوب” تلقى روحك مهناش! ومن؟ وكيف؟ وعلاش؟ ولا واحد حيتكلم ويعبرك ويدورك، يعني عادي في ناس سبق وكتبت على نشطاء إنخطفو إنهم كذابين! وغير هكي في منهم من تم إغتياله فقالو عليه (كلب ومات) فقصدي كيف تبي ايجي يوم وتلقى من يدافع عليك مادام حتى اللي يتكلم ويقول في رأيه حقه مهضوم وحياته رخيصة والناس تسكت عليه وتقول هذا هكي داروله لأنه ايدير في الشطانة! ولا هذا طالب سلطة!

    عالهامش: لما تتكلم ياصديقي ماتستناش من حد حاجة وإكتب لبيان كلمة الحق ولوجه الله ومادخلكش بالعبد، لأن العبد خاين وماعنداش صاحب، اليوم يضحكلك ويعلق عليك ويقولك الله ينصرك ولما تنقام، ينكرك.

  6. أي حد مات ولا مخطوف ولا متعذب ولا أياماته سود طبعاًعندنا ليه تبرير قاسي، هذا أزلام، هذا مجرم، هذا قاتل، هذا مش عارف شني، ومن غير محكمة ولا دلائل ولا مرافعة ولا دفاع، من الأخير إنت كويس مادامك كويس، ويوم إتطيح بنطلعو الموس ونشدوها تشليح فيك وفي أصل أصلك ومش بعيد تطلع يهودي أصلك وعميل ومن سكان الفضاء! وتقولي حقوق إنسان! تي المجرم في بلدان حقوق الإنسان قاعدين يحاولو ينفو عليه تهمة الإعدام بحجة أن الله وحدة ليه الحق في أخذ النفس، وحني حتى من شريعتنا ما نطبقوش فيها إلا حسب المزاج، هذا قيم عليه الحد وهذا معليشي آخرله مرة، وهداكا مسكين مايندريش!

باهي علاش العالم مش معبرنا لما تصير فينا مصيبة؟

  1. حني نقتلو في بعضنا البعض فعادي هادي يقولولها “مسألة داخلية” مش مجبر حد إنه يتدخل فيها، فقصدي عمرك سمعت بأن باريس هجمت على ليون ودمرت المطار فيها!؟ وتنزل تصاوير الناس فرحانة تهلل بحرق مطار بلادهم، قصدي هل يعقل هذا الخبر إنك تقراه في الإنترنت من غير ما تقول “هههههههههههههههه” على طول بطنك؟ ولا ممكن تشد شعرك وتبدا تنتف؟
  2. هل سمعت بخبر احتراق سوق وال-مارت على بكرة أبيه في واشنطن والناس قعدت تقول عليه هذا فعل من أفعال جماعة تيكساس وجماعة تيكساس يقولو هادو الكلاب متاعين نيويورك داروها ولازم نردو عليهم!؟
  3. إمالا تطلع في شوارع برلين وتشبح الناس تطلع في الأحمر وتخش في العكسي لن شرطي المرور مهناش ومافيش كاميرات؟ راهو للعلم بس سمافروات برلين مافيهمش عدادات!
  4. ياراجل الغريب تلقى من يدعم في فريق ضد الثاني ويقوله الله أكبر يا ثائر وهو مايعرفاش ولايندري على ملته من وين ولا حتى يندري على توجهاته وهل هو بالفعل يقاتل لأجل ليبيا ولا لأجل مصالحه الشخصية، وماحارقلي دمي إلا هادو اللي مقعمزين في حياشهم وعالنت يشجعو تقول مبارة كورة! تي هادي بلادك يانهارك الأسود.
  5. علاش ماتكونوش يد وحدة وتشبحو للمصلحة العليا ونكونو جماعة وعادي نتنازلو على قناعات مقابل النجاة للآخرين؟ يعني حتى لما معمر ناض بيقمع الثورة في فبراير 2011 كنت شخصياً ضد أي تدخل خارجي، ويوم قالو No Fly Zone قلت لا مانبوشي ونبو نتفاهمو مع بعضنا، بعدين بنغازي قالو خلاص بيرحينا رحي ومعاش بيفضل فينا شي، قلت مادام أهل المدينة مع التدخل الخارجي فحتى اني معاهم لأن مايحس بالنار إلا اللي عافس فيها، وأني في طرابلس ماطاق فيا شي وقتها لكن حسيت بولد بلادي ووقفت معاه ودعمته حتى وأني مش مقتنع بأساس الفكرة! بتقولو علي يكذب؟ تفضل الدليل تغريدة على تويتر في فبراير 2011..

وكذلك..

بتقولي ماتقارناش بيهم هادو مش زينا؟

  1. تي كيف مانقارنكش بيهم يامسلم يا اللي حبيبك رسول الله صلى الله عليه وسلم ومتعفلق من الفيلم ومتعفلق من الكاريكاتير ولما نقول نتلاقو غضوة تقولي قول إن شاء الله! تي إيه بنقارنك بالكفار يا مسلم اللي توا يطبقو في نص دينك من حب وتسامح وإحترام وإنت مش مطبق منه إلا الشعائر وحاسب روحك مسلم!
  2. قصدي مش واضحة الصورة قدامك ومازال نقولو على روحنا مسلمين وأحسن شعب وكله من “التاغية” وهادو الأزلام هكي يخربو في البلاد وإلخ إلخ من القيء اللي تسمو إنتم فيه كلام ومنطق ووطنية؟
  3. العالم الأول لما يغلط مايعلقش مشاكله على شماعة النظام السابق أو الرئيس السابق أو الحكومة السابقة أو الطابور الخامس او غيره، بل يطلع يقول المصيبة ويقول الحل لو عنده او يعلن عن طلبه المساعدة من الغير، أما حني “كوتي كوتي حتى تموتي” وهكي لا حلال لا حرام، أقتل أقتل أقتل وبس.
  4. بعدين تعالا جاي، من وين جبتوها كلمة وطنية اللي ضحكتو بيها علينا؟ ترا وريني الوطنية هادي قبل 1400 سنة وين بالزبط موقعها؟ تي هالكلمة ضحكو بيها الطغاة علينا باش يبررو حاجات ماليناش علاقة بيها كمسلمين سواء عرب أو امازيغ.
  5. الحضارات تتطور بتأنيب النفس وتصحيح الغلط وإننا نشوفو للأحسن والأفضل ونقولو علاش حني مش خير منه، مش تشوف للي أقل منك وتقول إيه الحمدلله والله أني خير منه! هذا منطق أعوج ماقالش بيه ربي! ربي قالك وأما بنعمة ربك فحدث لكن في أساسيات قبلها يا صديقي أول حاجة تقيم العدل وإتطبق سنة الله ورسوله في نفسك قبل غيرك، مش تسيب كل حاجة وتشدهالي في جرة المرأة عورة المرأة فسق وتنسى الأساسيات وتشدها في جرة المرأة وصفت المرأة ونعت المرأة، تي شوف لروحك يا مصيبة إنت ياراجل شن مداير؟ البلاء كله والموت والقتل والخراب كله منك إنت ياراجل، أبدا بروحك قبل بعدين تفاهم مع مرتك وأختك وبنتك وماليكش علاقة بأهلي وعيلتي أني أهل بيهم!

الخلاصة:

لما ياليبي إنت وهو وهي تبدا مداير دولة وتحترم المواطن الليبي اللي زيك وتتافهم معاه بأساليب حضارية زي (الكلام) و(الحوار) و(النقاش) و(المناظرات) مش بأساليب همجية زي (القتل) و(الخطف) و(الارهاب) و(الحرب) يعني لما تولي إنسان متحضر وتبدا تحترم القانون وإطبقه من ذاتك من غير رقابة عليك من حد ومش تبدا تقولي أني حر وليبيا حرة واللي مش عاجبه يطلع برا، بس يعني هاديكا اللحظة اللي تولي فيها ياليبي إنسان متحضر، هداكا الوقت العالم حيبدا يشوفلك بعين الإعتبار.

بعدين فكونا من سياسة الكيل بمكيالين، تجي تتكلم وتقول الحق يطلعولك تاريخ أصل أصلك ويصنفوك آ إنت ترهوني آآآ إنتا زليطني آآآ إنتا كرغلي آآآ إنتا صفتك نعتك، وينسو الموضوع!! تي شن بدير بيا أني من وين ملتي مادام كلامي حق ولا لأنه وجاع وماعندكش رد عليه بتحاول تشوهني باش زعميته كلامي يبدا لايعتد بيه؟ لا ياصديقي، كلام الحق حيقعد كلام حق وكان قالهولك صهيوني فهو كلام حق وخود بيه وفكك من المزايدات وتغطية الشمس بالغربال، راهو والله في الأخير مايصح إلا الصحيح.

لهذا فيقو بالله عليكم وعاود إنت وياه أقرا المنهج من جديد وأفهم روحك وين عايش بالزبط وياسر أحلام وآمال فارغة ومعاش تولي ببغاء تنسخ في كلام الغير وتقول عادي تو تنفرج.. تي كيف تبيها تنفرج بروحها يا إنسان مادام رب الكون اللي يقول للشيء كن فيكون، قالك إنه مش حيغير حال الناس لين هالناس يغيرو اللي في نفوسهم، تخيل قدرة ربي عز وجل وقفت عند حد النفس ومش حيغيرها لين إنت ياعبد تغيرها.

حسبي الله ونعم الوكيل ولاحول ولاقوة إلا بالله العلي العظيم.

Advertisements

فكرة واحدة على ”العالم الأول.. والعالم الليبي!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s