تدمير ليبيا

تعليقاً على الأحداث الأخيرة في ليبيا، نوجه حديثي إلى جماعة البلاد آمنة ومافيها شي وآهو نلودو في الشوارع ومافيش خطف ومافيش قتل ومافيش مليشيات وتفائل ياراجل وإلخ إلخ من المسكنات وحبوب التخدير. فيقوا راهي ليبيا مش طرابلس ولا مصراتة ولا زليطن ولا الخمس، راهي ليبيا بلاد طول بعرض فيها 6 مليون إنسان لو أي واحد فيهم إنظلم أو تهدد أو إنقتل وهو بريء فمعناها ليبيا مش بخير أبداً ولا حالنا زي القذافي يوم قال (يقولو القتلى بالآلاف وهما مايجوش 200!) مستهين بالدم الليبي وكأن ال200 ولاحاجة!

العالم ينوض ومايقعمزش لما يموت شخص ظلم، تي الكفار الصليبيين زي ماتوصفو فيهم لما يموت حد منهم يهبوله هبة رجل واحد وحني يقولك (كلب ومات) ولو إستمرينا بهالعقلية المريضة هادي في التعامل مع بعضنا معناها بالفعل معاش في أمل، زمان كنت نقول تبيلنا متع 3 سنين أو ممكن خمسة على أبعد تقدير ونكونو دولة مستقرة، لكن عالحال هذا والله ماصايرة، وبالله عليكم ماتعطونيش حبة مسكن متع (تفائل خير) لأن التفاؤل يجي لما تشوف أفــــعــــال مش أقوال وأحلام!

إن الله لايغير مابقوم حتى يغيرو ما بأنفسهم، تخيلو ربي اللي يقول للشيء كن فيكون، جاك في الحاجة هادي بس وقالك إنه لن يقول للشيء كن فيكون إلا لما تغير ما بنفسك، وتقولي تفائل وإن شاء الله الخير جاي؟

حال الكثير من الليبيين المخدرين

حال الكثير من الليبيين المخدرين

ياراجل الدمار والخراب اللي صار بعد الثورة مش مشكلته في إنه صح ولا غلط، مشكلته إنه سيح دم وخلق عداوات ماتتصلحش إلا بعد عقود من الصلح وكل واحد يبي الثار من الثاني والعالم يتفرج علينا يا ناس ومازال يتسائل من هذا الشعب الرائع! الرائع بمعناها السلبي مش الإيجابي.

صفحة على الفيسبوك جمعت أشهر الأحداث في سنة 2014 من مختلف الزوايا، يعني الأثرية والإنسانية والقانونية وحتى الساخرة والمش منطقية، وندرجها هنايا مع إضافة بعض من ملاحظاتي وماذكره المعلقون على القائمة:

  1. تدمير مطار طرابلس العالمي.
  2. قصف خزانات النفط بطريق المطار واحتراقه لأيام معدودة.
  3. تهجير وقتل لمدنين آمنين في منطقة طريق المطار وهروب لأكثر من 2000 عائلة من المنطقة.
  4. هبوط صواريخ في مناطق بعيدة جداً عن مطار طرابلس مثل بن عاشور وزاوية الدهماني وقرجي وغوط الشعال وفرار الناس مذعورين.
  5. سرقة وأحتلال لمنازل آمنة في المناطق المحيطة بطريق المطار.
  6. بداية سلسلة اغتيالات نسائية سلوى أبوقعيقيص والكثير من الصحافين والناشطين.
  7. تدمير مطار بنينا ببنغازي.
  8. حكم المحكمة العليا  ببطلان مشروعية لجنة فبراير وكل ما صدر منها من قرارات ومنها قانون انتخاب مجلس النواب.
  9. إنقطاع الوقود على العاصمة والكهرباء مما سبب أزمة حقيقية في تشغيل المولدات في المستشفيات.
  10. انقطاع ادوية الهيموفيليا وتعنى نزف الدم الوراتى، وهي مرض ناتج عن خلل فى عوامل التختر فى البلازما ﻻعلاج له اﻻ انه يأخد بإستمرار هذا العامل على هيئة حقن من فترة لفترة طيلة عمر المريض وإلا سينزف الشخص جراء أي خذش بسيط دون توقف.
  11. اختفاء الغزالة من ميدان الغزالة في العاصمة.
  12. قصف وغارات جوية من قبل طائرات مجهولة الهوية.
  13. ازمة الوقود والكهرباء الطويلة بالعاصمة.
  14. اعدام عام في ملعب كرة قدم من قبل انصار الشريعة درنه.
  15. نزوح كبير لسكان اكبر مدينتين “طرابلس – بنغازي” جراء الاشتباكات.
  16. احتراق طائرات ليبية وتدميرها بشكل كامل.
  17. هدم الأضرحة والحاق اضرار والعبث بمساجد اثرية قديمة.
  18. ازدياد حالات الإختطاف للكثير من النشطاء.
  19. اغلاق الموانى النفطية و خطوط الانتاج.
  20. ماراثون السلام طرابلس.
  21. اعلان ميدان الجزائر شارع مخصص فقط للمشاة!
  22. فضيحة أبو سهمين رئيس المؤتمر الوطني وقوله “تعرفني ما اندس عليك في شيء يا هيثم”.
  23. طرابلس عاصمة الثقافة 2014 !؟
  24. جريمة قتل لفتاه في النهار بوابل من الرصاص بحي الاندلس.
  25. فيديو مطعم الفروج، والأفريقي الذي يدعي انه مصاب بالإيدز ويستمني على الأطعمخة ليقدمها للزبائن.
  26. تفجير مطعم الفروج بعد يومين من إنتشار فيديو الأفريقي والذي لايظهر فيه سوى قميص عليه شعار المطعم وأرضية غريبة وضعت فيها الاواني على الأرض.
  27. قرود وتماسيح تهيم في شوارع بنغازي وأحصنة تجوب طريق المطار فارة من الحرب.
  28. تدمير جامعة بنغازي.
  29. سرقة كأس افريقيا للشباب 2014 من مقر الإتحاد.
  30. احتلال طرابلس من قبل قوات عسكرية وكان اول بيان لها هو عودة المؤتمر الوطني.
  31. قصف مطار معيتيقة بالطيران الليبي.
  32. سرقة المصارف بمختلف أنحاء ليبيا.
  33. سفينه نفظ تخرج ويتم إسترجاعها بقوات أمريكية
  34. سرقة السفارة الامريكية.
  35. مبايعة البغدادي في درنة لداعش.
  36. مطالبة رابطة مهندسي مصراته بحق الفيتو على ليبيا
  37. يخرج من يقول أن مجلس الشباب الأسلامي في درنة الهدف منه أقامة دولة مدنية ديمقراطية للمحافظة على حقوق الأنسان والحريات العامة!
  38. مفتي البلاد يدعو لأستمرار الحرب بين الشعب الواحد ويرفض الدعوة للحوار وحقن الدماء
  39. شيخ محسوب على الإسلام يقول على قتلى حرب أن الصحابة رضي الله عنهم يحسدونهم على الموت في هذه الحرب!
  40. اغلاق السفارات وهروب موظفين اجانب يشغلونها كما يشغلون وظائف في شركات عديدة اخرى مما أوقف عجلة الحركة في إيجار المنازل والسيارات وغيره مما كانت البلاد تجنيه من تواجدهم فيها.
  41. تشرد العديد من الليبيين في الخارج وإيقافهم لشتى الأسباب منها أوراق الإقامة أو إيقاف بطاقات الفيزا أو بسبب تدمير المطارات ومبيتهم في المطارات على أمل العودة إلى الوطن.

وهادي مجرد قائمة لسنة 2014 لأهم الأحداث الجديدة اللي صارت، وماننسوش مصائب مستمرة من 2011 ومرت عليها ال2012 وال2013 والباين إنها حتى ال2014 حتمر أحداثها بدون تغيير، وكل يوم الموضوع يولي أسوأ من قبل ومازال تقولولي تفائل تفائل، يعني بنتفائل هكي تفاؤل غبي بدون سبب باش نحس بالراحة النفسية؟ لين يجيني الموت برجليه للحوش!؟ وقتها شن بتقولوا؟ أكيد بتقولولي “الله غالب”، أصلاً هذا ماعندكم، لأن لو فيكم الخير راهو مايجيكم نوم وفي دم عالأرض الليبية وفتنة كل يوم تكبر وتزيد بالدم والسلاح وإنتم تهللو لهذا وهداكا ومستمرين بالجري إلى اللانهائية ومابعدها!

ماعندي مانقوللكم إلا كليمة وحدة، #خزيه.

Advertisements

فكرة واحدة على ”تدمير ليبيا

  1. مقال يصف مايدور في الخلد صح منين بيجي التفائل حتى ربي يقول في كتابه (واحذرو فتنة لا تصيبن الذين ظلمو منكم خاصة) يعني المصيبة اللي بتجي حتكون عالكل ومافيش حد مستتني منها لكن مافيش حد معتبر ولو ان الجزء الاكبر من الناس في البلاد هادي كانت باهية راه ماصارش هذا كله

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s